Skessuhorn:

Nýir forstöðumenn á DAB

6. mars 2008

Um síðustu mánaðamót tók í gildi nýtt skipulag innanhúss á Dvalarheimili aldraðra í Borgarnesi, DAB, þegar skerpt var á línum í rekstri heimilisins með því að ráða tvo nýja forstöðumenn, annars vegar í þjónustusvið heimilisins og hins vegar hjúkrunarsvið. Halla Magnúsdóttir tók við starfi forstöðumanns þjónustusviðs heimilisins en undir það heyrir mannahald og skipulag á afþreyingu heimilisfólks, þvottar, ræsting og eldhús. Jórunn María Ólafsdóttir var ráðinn í starf forstöðumanns hjúkrunarsviðs á sama tíma. Hún hefur umsjón með mannahaldi og faglegri umsjón með umönnun heimilisfólks.

Björn Bjarki Þorsteinsson framkvæmdastjóri DAB segir að með þessu sé verið að skerpa línurnar í rekstri heimilisins. „Hér eru um fimmtíu manns í heimili sem sextíu starfsmenn sinna í 40 stöðugildum og það er nauðsynlegt að fara yfir þessi mál varðandi innra skipulag öðru hvoru. Halla Magnúsdóttir hefur sinnt starfi forstöðukonu undanfarin misseri og gert það með miklum ágætum en þar sem við þurfum að auka hjúkrunarþáttinn í okkar starfi þá var talið heppilegt að stíga þetta skref nú. Ég tel að við séum mjög heppin að hafa fengið þær stöllur til að taka að sér þessi verkefni og við lítum björtum augum fram á veginn hér á DAB.“