Laufey og Þröstur á Stakkhamri fá landbúnaðarverðlaun

Landbúnaðarverðlaun voru í dag veitt við upphaf Búnaðarþings. Guðni Ágústsson landbúnaðarráðherra afhenti landbúnaðarverðlaunin sem nú eru afhent í ellefta skipti, en verðlaunin hlutu ábúendur á bæjunum Syðra-Skörðugili, Ásaskóla (minkabúið Mön),Úthlíð og Stakkhamri á Snæfellsnesi. Hjónin Laufey Bjarnadóttir og Þröstur Aðalbjarnarson á Stakkhamri fá verðlaunin fyrir áræði og dugnað í kúabúskap. Eins og Skessuhorn greindi frá fyrir skömmu var búið á Stakkhamri með hæstu afurðir kúa á liðnu ári en þar hefur markviss ræktun og dugnaður bænda sannarlega skilað sér.