Nokkuð er síðan bæjarstjórn Borgarbyggðar ákvað að byggja nýjan leikskóla við Ugluklett í Borgarnesi. Í síðustu viku ákvað síðan byggðaráð hinnar nýju Borgarbyggðar að fela Sigurði Páli Harðarsyni bæjartæknifræðingi að semja við SG-hús hf. á Selfossi um kaup á húsi fyrir leikskólann. Einnig var honum falið að bjóða út aðra verkþætti við byggingu leikskólans. Þessi ákvörðun byggðaráðs vakti nokkra undrun því eins og kunnugt er stendur byggingariðnaður traustum fótum í sveitarfélaginu.
Páll Brynjarsson sveitarstjóri Borgarbyggðar segir nokkra umræðu hafa orðið um þessa ákvörðun byggðaráðs og hann muni funda með verktökum í sveitarfélaginu á næstu dögum vegna málsins. Hann segir að nefnd sem í hafi setið fulltrúar stjórnmálaflokka og fagaðila hafi á sínum tíma kynnt sér þá kosti sem í boði voru vegna byggingar nýs leikskóla. Meðal annars hafi nefndin kynnt sér leikskóla sem SG-hús hf. hafi hannað og reist á nokkrum stöðum. Nefndinni hafi litist vel á og lagt til að hús af þeirri gerð yrði keypt. Páll segir að SG-hús selji einungis hönnun og einingar hússins og sá kostnaður sé einungis hluti endanlegs framkvæmdakostnaðar eða um 30 milljónir af um 110-120 milljóna króna heildarkostnaði. Því eigi eftir að taka ákvörðun um með hvaða hætti stærstur hluti verksins verði framkvæmdur. | 
