 Laxveiðin er að komast á fullt þessa dagana, hver veiðiáin af annarri opnar fyrir spenntum veiðimönnum. Norðurá opnaði 1. júní og þar hafa nú veiðst um 20 laxar og er 12 pund sá stærsti. Þverá í Borgarfirði opnar 12. júní, Laxá í Leirársveit 18. júní, Grímsá 20. júní og Langá sama dag. Fluguveiðiskólinn byrjar í Langá 18. júní og gætu fyrstu laxarnir komið á land hjá "skólabörnunum hans Ingva Hrafns."
|
Vel hefur gengið að selja veiðileyfi í laxveiðiárnar á Vesturlandi eins og raunar víða um land, uppselt er í margar ár og aðeins hægt að komast í silung eða í ódýra laxveiði.
“Ég reyndi að fá veiðileyfi í Norðurá en það gekk ekki, hún er næstum uppseld,” sagði veiðimaður sem reyndi í fleiri veiðiám á svæðinu en án árangurs. “Það er fyrir löngu uppselt hjá okkur í Langá,” sagði Ingvi Hrafn Jónsson, er við spurðumst fyrir um laus veiðileyfi. Sömu sögu er að segja um Laxá í Leirársveit, Grímsá, Flókadalsá, Hítará, Álftá, Haffjarðará og Straumfjarðará, svo fáar einar séu nefndar til sögunnar. Veiðileyfi eru því vandfundinn á góðum og þar af leiðandi dýrum tímabilum í ánum. |
