Skessuhorn:

Enn barist við elda á Mýrum

31. mars 2006

Mikill fjöldi slökkviliðsmanna frá Akranesi, Borgarnesi, Búðardal, Reykjavík og Borgarfirði er nú við störf á Mýrum og freista menn þess að hefta enn frekari útbreiðslu sinueldsins sem átti upptök sín við Snæfellsnesveg í gærmorgun. Nú þegar hefur á milli 60-80 ferkílómetrar lands brunnið og er talið að hér sé um að ræða mestu sinubruna sem skráðar heimilildir eru til um að orðið hafi hér á landi. Enn hefur slökkviliði tekist að verja mannvirki á þeim bæjum sem eldurinn hefur náð að og ljóst að bæði slökkviliðsmenn, bændur og aðrir hafa unnið þrekvirki við erfiðar aðstæður. Notast er við dráttarvélar með haugsugur, slökkvibíla og ekki síst klöppur því ekki er alltaf hægt að koma slökkvitækjum að eldinum. Seint í kvöld var mestur eldur í nágrenni Ánastaða.

Á meðfylgjandi gervitunglamynd sem tekin var um miðjan dag í gær má glöggt sjá (ef smellt er á stækkaða útgáfu myndarinnar) hversu stórt landssvæðið er sem brunnið hefur.

Blaðamaður Skessuhorns var á ferðinni í Hraunhreppnum nú síðari hluta dags og framyfir kvöldmat og börðust menn enn við elda í nágrenni nokkurra bæja. Vonir standa til að takist hafi að hefta útbreiðslu elda nú undir kvöld þannig að þeir nái ekki til bóndabæja sem þarna eru. Slökkvistarf heldur áfram í kvöld og vafalaust einnig í nótt og á morgun.