Skessuhorn:

Ólíft fyrir óþef af rotnandi síld

9. janúar 2013

„Þegar vindur stendur af sjó í austlægum áttum, er alveg ólíft hér á bænum fyrir óþef af rotnandi síld,“ segir Bjarni Sigurbjörnsson bóndi á Eiði við Kolgrafafjörð. Í kjölfar síldardauðans um miðjan síðasta mánuð hefur mikið af dauðri síld skolað á land með tilheyrandi mengun. Frá stjórnvöldum hafa bændur á Eiði fengið þau skilaboð að hreinsun fjörunnar væri mál landeigenda líkt og ef um hvalreka væri að ræða. Slík landhreinsun er eðli málsins samkvæmt ekki á færi einstaklinga eða landeigenda í þessu tilfelli, enda mengunin ekki bundin við fjöruna heldur allan botn fjarðarins þar sem um 30 þúsund tonn af dauðri síld liggja. Sjá nánar í Skessuhorni sem kom út í dag.