Slökkvilið Dalabyggðar lögregla og sjúkraflutningsmenn voru með viðbúnað í gærkveldi þegar útkall barst vegna reykjarlyktar og hugsanlegs elds í hjúkrunar- og dvalarheimilinu Fellsenda í Miðdölum. Þegar slökkvilið kom á vettvang sást hvergi eldur en við nánari skoðun kom í ljós að reykjarlyktina lagði upp úr niðurfalli utan dyra, þar sem starfsmenn fleygja gjarnan sígarettustubbum. Þurrkatíð að undanförnu er talin hafa skapað þarna íkveikjuhættu, en komin var glóð í stubbahauginn. Ekki þurfti nema eina fötu af vatni til að ljúka slökkvistörfum.
Til gamans má geta þess að gárungarnir í Dölunum gátu sér til um það í vetur þegar sýning þáttanna Heimsendir stóð yfir á Stöð 2, að Fellsendi væri fyrirmynd hjúkrunarstofnunarinnar í þáttunum, þótt heimilisfólk þar sé við mun betri andlega heilsu en fólkið í þáttunum. Heimilisfólk á Fellsenda kemur víða að af landinu og fyrir marga sem koma að heimsækja það er eins og að fara á heimsenda, að þeirra sögn.
| 
