Skessuhorn:

Systkini af Akranesi sprengdu göng

25. apríl 2012

Á nokkrum stöðum nyrst í Noregi vinnur íslenska verktakafyrirtækið Ístak að gerð jarðgangna. Ein þeirra eru staðsett í Finnmörku skammt frá bænum Talvik. Bærinn er í sveitarfélaginu Alta og stendur við Altafjörð. Í nótt var síðasta haftið sprengt í Talvik göngunum og vakti athygli að þrjú íslensk ungmenni frá Akranesi fengu þann heiður að fara ein inn í göngin og sprengja síðasta haftið í göngunum. Þetta voru systkinin Guðmundur Jóhann, Allan Gunnberg og Maren Rós Steindórsbörn. Móðir þeirra er Rósa Allansdóttir en hún hefur um árabil séð um mötuneyti fyrir Ístak bæði hér á Íslandi og víða erlendis þar sem fyrirtækið hefur verið með starfsemi. Að sögn Marenar Rósar gekk sprengingin vel en sprengt var um klukkan þrjú í nótt. Ástæða þess að systkinin fengu þetta verk var að eldri bróðir þeirra er verkstjóri Ístaks á staðnum.