Skessuhorn:

Baráttusigur Snæfellskvenna tryggði þeim sæti í úrslitakeppni

14. mars 2012

Í gærkvöldi mættu Snæfellsstúlkur liði Keflvíkinga í Toyota höllinni í Keflavík í mikilvægum leik fyrir bæði liðin. Fyrir hann var lið Keflavíkur búið að vinna 13 heimaleiki í röð og hefðu því með sigri getað tryggt sigur í efstu deild kvenna og hampað bikar að leik loknum. Það tókst þó ekki því Snæfellskonur stóðu í þeim keflvísku og sigruðu að lokum. Keflavík byrjaði leikinn betur en liðin skiptust þó á um að vera með forystu mest allan leikinn og hvorugt liðið fór langt fram úr hinu. Þegar 46 sekúndur voru eftir að leiknum skoraði Hildur Sigurðardóttir tvö stig og kom Snæfelli í 57-61. Keflavíkurstúlkur skoruðu þá tvö stig í næstu sókn og náðu svo varnarfrákasti í næstu sókn Snæfells. Pálína Gunnlaugsdóttir hjá Keflavík, reyndi svo að stela sigri með þriggja stiga skoti í blálokin en hitti ekki. Leikurinn endaði því 59-61 Snæfellsstúlkum í vil, en bæði lið voru ekki að hitta vel.

Keflavík var með 30% skotnýtingu og Snæfell með 28%. Hildur Sigurðardóttir spilaði vel og var með 16 stig, tíu fráköst og fjórar stoðsendingar, Jordan Lee Murphree var með 12 stig, 13 fráköst og tvær stoðsendingar. Fyrir Keflavík spilaði Pálína Gunnlaugsdóttir best með 29 stig, tók tíu fráköst og átti þrjár stoðsendingar.

Snæfellsstúlkur eru nú í þriðja sæti deildarinnar en með þessum sigri eru þær öruggar um að fara ekki niður fyrir fjórða sæti. En Keflavíkurstúlkur þurfa að reyna að tryggja sér sigur deildarinnar í næsta leik.