Skessuhorn:

Pollapönk með tónleika í Borgarnesi og Stykkishólmi á sunnudaginn

9. mars 2012

Hljómsveitin Pollapönk mun heimsækja Vestlendinga á sunnudaginn. Þá ætlar hljómsveitin að halda tónleika í Borgarnesi og í Stykkishólmi. Tónleikarnir í Borgarnesi fara fram í Félagsmiðstöðinni Óðali og hefjast klukkan 13:00 og tónleikarnir í Stykkishólmi í Hótel Stykkishólmi klukkan 18:30.Tónleikarnir eru ætlaðir fyrir börn jafnt sem fullorðna. Hljómsveitin Pollapönk er skipuð þeim Heiðari Erni Kristjánssyni, Haraldi Frey Gíslasyni, sem áður gerðu garðinn frægan með hljómsveitinni Botnleðju, og þeim Guðna Finnssyni og Arnari Gíslasyni. Markmiðið hljómsveitarinnar er að búa til tónlist og texta sem er bæði fyrir börn og fullorðna. Einnig hefur Pollapönk leitast við að skapa tónlist fyrir börn sem fylgt er eftir af sama metnaði og ef um hljómsveit fyrir fullorðna væri að ræða.

Tónleikarnir eru partur af tónleikaferðalagi hljómsveitarinnar um landið sem fram fer í mars. Koma Pollapönksmenn til með að „bruna á milli bæjarfélaga og blása í lúðra fulla af gleði og glensi og tvímælalaust skemmta börnum og þeirra fylgdarfólki,“ eins og segir í tilkynningu frá sveitinni. Hljómsveitin skipuleggur hverja tónleika í samstarfi við íþróttafélög í viðkomandi bæjarfélagi og mun hluti af aðgangseyri renna í sjóði félaganna. Með þessu vill hljómsveitin styrkja og efla íþróttalíf bæjarfélaganna. Það eru Umf. Skallagrímur og Umf. Snæfell sem koma að tónleikahaldi í bæjunum tveimur. Aðgangseyrir er kr. 1200 en frítt er fyrir fullorðna í fylgd með börnum.