Skessuhorn:

Kaffi Vínyll opnar í Fossatúni í dag

21. apríl 2011

Kaffihúsið Kaffi Vínyll verður opnað í dag í Fossatúni í Borgarfirði. Í fréttatilkynningu segir að á kaffihúsinu verði boðið upp á fjölbreyttar veitingar með áherslu á heimagert ljúfmeti, hádegishlaðborð, rétti dagsins, grillmeti og fleira. Á síðasta ári voru 700 vinylplötur settar upp í veitingasal á staðnum. Gestir í Fossatúni sýndu þessu mikinn áhuga og höfðu frammi óskir um að fá ákveðna tónlist með ákveðnum réttum. Þannig hefur það sannreynst að hljómsveitin Shadows fer til dæmis ákaflega vel með plokkfiski, eins og segir í tilkynningu.

Um 3.000 vinylplötur hafa nú verið settar fram sem gestir geta skoðað og fengið að hlusta á. Plötusafnið er eign Steinars Berg en hann var áður útgefandi íslenskrar tónlistar, umboðsmaður erlendra útgáfufyrirtækja og rak auk þess nokkrar plötubúðir. Safnið endurspeglar það sem hann hlustaði á frá á sjöunda, áttunda og níunda áratugnum, þegar veldi vinylplötunnar reis hvað hæst. Á staðnum eru einnig 30-40 ára gamlar græjur í toppstandi úr eigu Steinars. Hátalararnir voru lengi vel stærstu heimilishátalarar landsins og þegar fyrsta vörusýningin var haldin í Laugardalshöllinni á síðari hluta áttunda áratugarins voru þeir fengnir til afnota þar. Veitingasalurinn er skreyttur með gullplötum og nokkrum öðrum munum sem tengjast útgáfustarfssemi Steinars. Því til viðbótar er hægt að glugga í nokkra árganga tónlistartímarita og fletta bókum sem fjalla um þetta tónlistartímabil.

Kaffi Vínyll verður opið nú um páskana og allar helgar fram til loka maí, en þá tekur við almennur opnunartími.