Skessuhorn:

Annar flokkur ÍA Faxaflóameistari

20. apríl 2011

Annar flokkur ÍA varð í gærkveldi Faxaflóameistari er stúlkurnar luku keppni með 1:1 jafntefli gegn Stjörnunni. Það var Elísa Svala Elvarsdóttir sem skoraði mark liðsins. Stelpurnar hafa verið gríðarlega sterkar á Faxaflóamótinu og fyrir leikinn höfðu þær unnið alla níu leiki sína í keppninni, enduðu því með 28 stig í 10 leikjum með markatöluna 44:3.  Samhliða Faxaflóamótinu hafa stúlkurnar tekið þátt í Lengjubikar kvenna, sem meistaraflokkur. Þar eru þær efstar í sínum riðli með 7 stig eftir 3 leiki, en hafa verið undir miklu leikjaálagi að undanförnu og eiga til að mynda leik við Keflavík í Reykjaneshöllinni annað kvöld, fimmtudag. Þjálfari stúlknanna er Elvar Grétarsson.