Tilkynnt var á dögunum um tilnefningar til viðurkenningar Hagþenkis árið 2010. Meðal tilnefndra er Ingimar Sveinsson, fyrrverandi kennari á Hvanneyri, fyrir bókina Hrossafræði Ingimars sem út kom frá Uppheimum fyrir síðustu jól. Í umsögn Hagþenkis segir um bókina að hún sé „brautryðjandaverk og alhliða upplýsinga-, kennslu- og fræðirit fyrir leika og lærða á sviði hrossahalds og tamninga.“ Hagþenkir hefur frá 1986 veitt viðurkenningu fyrir fræðirit, námsgögn eða aðra miðlun fræðilegs efnis til almennings. Viðurkenning Hagþenkis telst til virtustu og veglegustu verðlauna sem fræðimönnum og höfundum fræðilegra rita fyrir skóla og almenning getur hlotnast. Viðurkenningarráð Hagþenkis ákveður hvaða 10 höfundar eru tilnefndir og velur þann sem hlýtur viðurkenninguna.
|
Hinir níu höfundarnir eru: Eysteinn Þorvaldsson, Guðni Th. Jóhannsson., Gunnar Hersveinn, Helgi Hallgrímsson, Kristín Loftsdóttir, Sigrún Pálsdóttir, Una Margrét Jónsdóttir, Unnur Birna Karlsdóttir og Þröstur Helgason.
|
