Leikvöllurinn sem liggur á milli Brekkubrautar og Heiðarbrautar á Akranesi er nær ónýtur eftir skemmdarvarga. Rólurnar hafa verið brotnar niður og þá hafa netið í fótboltamörkunum verið brennd. Íbúi á svæðinu sagðist í samtali við Skessuhorn vera miður sín. „Það er ömurlegt að horfa upp á þetta. Leiksvæðið hefur jafnan verið mjög fínt og barnapíur koma gjarnan hingað með börn sem þær eru að passa.“
Skemmst er að minnast frétta Skessuhorns frá því í gær um ítrekuð skemmdarverk við Byggðasafnið í Görðum en þar er haft eftir Tómasi Guðmundssyni verkefnastjóra Akranesstofu að verið sé að íhuga hvernig hægt sé að bregðast við skemmdarverkum sem þessum. Að auki hafa salernishúsin við Langasand og gamli vitinn á Suðurflös orðið fyrir barðinu á skemmdarvörgum. „Við verðum bara að höfða til bæjarbúa að vera einnig á vaktinni og láta vita ef þeir verða varir við skemmdarverk á þessum sameiginlegu eigum okkar. Auðvitað er þetta allt kært til lögreglu en hún getur átt erfitt um vik með að upplýsa mál þegar langt er liðið frá þessum athæfum,“ sagði Tómas ennfremur.
| 
