ÍA gerði jafntefli í Grafarvoginum

ÍA mætti Fjölni á Fjölnisvelli í 1. deild karla í knattspyrnu í gærkvöldi. Bæði lið þurftu á sigri að halda en aðeins tvö stig skildu liðin að fyrir leikinn. Liðin gerðu hins vegar 1-1 jafntefli og fengu eitt stig hvert. Fjölnir er nú í fimmta sæti með 22 stig en ÍA heldur sjötta sætinu og eru komnir með 20 stig eftir 14 umferðir.

Þrátt fyrir mikla yfirburði í fyrri hálfleik náðu Skagamenn ekki að koma boltanum í netið. Hjörtur Júlíus Hjartarson og Ragnar Leósson komust meðal annarra í dauðafæri en ekki vildi boltinn inn fyrir marklínuna. Fjölnismenn komust þó inní leikinn þegar líða tók á fyrri hálfleik og náðu að skora á 41. mínútu. Staðan í leikhlé var því 1-0 Fjölni í vil.

Skagamenn gáfust þó ekki upp og ákveðni þeirra skilaði þeim marki eftir tíu mínútna leik í síðari hálfleik. Eftir skot í stöngina frá Andra Adolphssyni, skot frá Arnari Má Guðjónssyni sem Fjölnismenn björguðu á línu fór boltinn loksins í netið. Hjörtur Júlíus Hjartarson átti skot á stuttu færi og jafnaði metin fyrir ÍA. Eftir þetta var leikurinn fremur jafn. Bæði lið náðu að skapa sér góð færi en fleiri urðu mörkin ekki. Lokatölur í Grafarvogum 1-1. Skagamenn hafa nú leikið sex leiki í röð án taps og því komnir á gott skrið eftir afleita byrjun í sumar.

Umferð farin að þyngjast gegnum Borgarnes

Lögreglan í Borgarnesi hefur í nógu að snúast varðandi umferðargæslu á svæðinu. Unglingalandsmót UMFÍ er haldið í Borgarnesi um helgina og fólk er farið að streyma í bæinn. Margir voru komnir á tjaldstæðin í gær en mótið hófst kl. 13 í dag. Í dag er aðeins keppt í körfubolta en á sjötta hundrað keppendur eru skráðir í hann. Keppni hefst svo í hinum ýmsu greinum snemma í fyrramálið svo búist er við að straumurinn í bæinn verði stöðugur í dag og í kvöld. Hingað til hefur allt gengið vel, allir eru glaðir og bæjarbúar hafa meira að segja tekið höndum saman og skreytt götur sínar. Þjóðvegur eitt liggur um Borgarnes og margir landsmenn á faraldsfæti um helgina. Mikil umferð er því í gegnum bæinn og þarf lögregla að koma í veg fyrir að umferð teppist auk þess að sinna lögbundinni löggæslu varðandi hraðakstur og fíkniefnaakstur.

Safnabókin 2010 er komin út

Safnabókin 2010 er komin út og hefur verið dreift um allt land. Hún er ferðamönnum að kostanaðarlausu og er því tilvalin í ferðalagið. Bókin er til bæði til á ensku og íslensku. Með útkomu Safnabókarinnar er í fyrsta sinn til heildstæð skrá á aðgengilegu formi fyrir ferðamenn yfir öll söfn, setur og sýningar á Íslandi. Safnabókin 2010 er sameiginlega upplýsingabók um öll söfn, setur, sýningar, höfuðkirkjur og þjóðgarða á Íslandi. Bókinni er ætlað að kynna söfn landsins með kraftmiklum hætti og efla þannig safnamenningu og menningartengda ferðamennsku.

Æringinn Steini í Runnum í spjalli

Hann heitir fullu nafni Einar Steinþór Traustason. Krakkarnir segja að hann sé gröfukarl og skólabílstjóri sem taki mikið í nefið og sé skemmtilegur. Hann er reyndar aldrei kallaður annað en Steini í Runnum, þrátt fyrir að þaðan hafi hann flutt fyrir löngu. Hann býr í húsi sem hann byggði á lóð úr landi Samtúns í Reykholtsdal. Gott skap, æðruleysi og gamanmál á hraðbergi er það fyrsta sem manni dettur í hug þegar lýsa á Steina. Hann er svona æringi sem leitast frekar við að sjá björtu hliðarnar á hlutunum heldur en að lita þær óþarflega dökkum litum. Mannkostir sem vissulega eru til bóta nú á tímum. Fyrir langa löngu óskaði hann til dæmis eftir því að þegar hann félli frá yrði sungið yfir honum; “Komdu og skoðaðu í kistuna mína.” Amma hans sagði honum þegar hann var ungur sveinn að hann ætti ekki að hafa neinar áhyggjur af kvenmannsleysi. Konuna finndi hann um fertugt. Það stóð heima, fertugur og tveimur dögum betur kynntist hann eiginkonu sinni Sigrúnu Hjartardóttur.

Sjá ítarlegt viðtal við Steina í Skessuhorni sem kom út í gær.

Bikarævintýri Víkinga lokið

Víkingur Ólafsvík datt út úr VISA-bikar karla í knattspyrnu í undanúrslitaleik við FH í gærkvöldi. Ætla má að Ólafsvík hafi staðið mannlaus eftir heima, svo stór var stuðningsmannahópur Víkinga í Kaplakrika. Úrslitin urðu 3-1 FH í vil eftir heldur jafnan leik og góða baráttu.

Leikurinn byrjaði mjög fjörlega og Víkingar mættu ákveðnir til leiks. Gestirnir áttu fyrstu færi leiksins og voru óheppnir að ná ekki að nýta sér þau. FH komst betur inní leikinn eftir því sem leið á fyrri hálfleik og skoruðu þeir fyrsta mark leiksins á 40. mínútu með skalla. Víkingar voru þó ekki lengi að svara fyrir sig; áttu góða sókn aðeins tveim mínútum seinna sem endaði í netinu með sjálfsmarki varnarmanns FH. Staðan var því 1-1 í hálfleik.

FH-ingar voru mun líflegri í seinni hálfleik og komust yfir á 57. mínútu. Víkingar gáfust þó ekki upp og fengu nokkur tækifæri til að bæta við marki án árangurs. Á 75. mínútu fengu Víkingar dæmt á sig víti sem heimamenn skoruðu örugglega úr. Eftir þetta þriðja mark FH-inga dró ekki mikið til tíðinda en gestirnir gáfust þó aldrei upp. Segja má að Víkingar hafi hér mætt ofjörlum sínum enda eru FH núverandi Íslandsmeistarar en Víkingur Ó. spilar í annarri deildinni. Víkingar mega vera stoltir af því að hafa komist svona langt enda hefur það aldrei áður tekist í sögu félagsins.