medium

thumbnail

small

custom-size

Lánveitingar Byggðastofnunar halda áfram að skapa störf

large

1536x1536

2048x2048

ÍA og Tindastóll mætast í Mjólkurbikarnum

Þungatakmarkanir taka gildi á fimmtudaginn

Fyrri umferð biskupskosningar lokið – Elínborg datt út

Vel mætt á fund miðbæjarsamtakanna um Akratorg

Úthlutað úr Minningarsjóði Heimis Klemenzsonar

core/freeform

Áslaug Þorsteinsdóttir á Akranesi hefur um nokkurt skeið átt þann draum að eignast nýjan hest. Hryssuna Stemmu hefur hún átt í mörg ár og náðu þær vel saman. Nú er Stemma orðin gigtveik og gengur í haganum á Skálpastöðum, en þaðan er Áslaug. En til að fá draum sinn uppfylltan og kljúfa málið fjárhagslega fór Áslaug í óvenjulega vegferð sem segja má að hafi heppnast vel. Hún setti inn færslu á fjölfarinni Facebook síðu og óskaði eftir stuðningi frá fólki til að fá draum sinn uppfylltan. Bauð hún m.a. til sölu perlusaum sem hún hefur unnið og óskaði jafnframt eftir frjálsum framlögum frá velviljuðu fólki sem vildi leggja henni lið við að safna fyrir nýjum hesti. Viðtökurnar létu sannarlega ekki á sér standa enda margir sem vilja hjálpa Áslaugu. Á annað hundrað manns styrktu hana með einum eða öðrum hætti. Safnaði hún með þessu móti 150 þúsund krónum og keypti í framhaldi söfnunarinnar sex vetra hestinn Gaur frá Hólakoti í Eyjafirði og greiddi fyrir hann tvö hundruð þúsund krónur. Gaur hitti Áslaug svo í fyrsta skipti síðastliðinn fimmtudag í hesthúsahverfinu á Æðarodda á Akranesi. Belinda Ottósdóttir flutti hestinn að norðan aðfararnótt fimmtudags.

Blaðamaður Skessuhorns var með í för þegar Áslaug hitti Gaur. Fyrirfram kvaðst hún vera dálítið spennt fyrir að hitta hestinn, enda hefði hún tekið áhættu og keypt hann óséðan en eftir lýsingum vina sem hún treysti. En það urðu fagnaðarfundir og Gaur tók Áslaugu strax vel. Hann er sex vetra hestur, stór og fallega jarpur að lit. Áslaug lagði við klárinn og úti í gerði við hesthúsið snaraði hún sér á bak og reið nokkra prufuhringi.

„Mér á eftir að þykja mjög vænt um hann Gaur þegar fram líða stundir,“ segir Áslaug. „Það jafnast ekkert á við góða vináttu eins og er milli mín og Stemmu minnar. Þannig held ég að Gaur verði líka. Ég þarf bara að vera þolinmóð og gefa honum tíma til þess að kynnast mér og nýja umhverfinu sem hann er kominn í og ég þarf líka að gefa mér tíma til þess að kynnast honum eins og Stemmu á sínum tíma,“ sagði Áslaug. Hún áætlar að hafa Gaur á Akranesi fram á haustið en sleppa honum eftir það í hópinn uppi á Skálpastöðum. „Það er svo mikið að gera hjá mér í ýmsu félagsstarfi og íþróttum á veturna að ég get ekki gefið mér tíma til að hafa hest þá. Ég er á fullu í sundi og æfi einnig boccia, samhliða því að vinna í Fjöliðjunni,“ segir Áslaug. Hún kveðst að lokum vilja koma á framfæri kærum þökkum til að allra sem hjálpuðu henni að láta drauminn um nýjan hest verða að veruleika.

Fékk draum sinn um nýjan hest uppfylltan