Þingflokkur Pírata fordæmir fjöldauppsögn HB Granda

Þingflokkur Pírata fordæmir þá ákvörðun HB Granda að segja upp hátt í níutíu starfsmönnum og færa alla bolfiskvinnslu frá Akranesi til Reykjavíkur. „Með þessu setur fyrirtækið ekki aðeins framfærslu þessa fólks í uppnám heldur skilur heilt bæjarfélag eftir í sárum. Stærsti hluti þeirra sem HB Grandi segir nú upp eru harðduglegar konur, meðal annars einstæðar mæður sem lifa nú í algjöri óvissu um framfærslu sína og fjölskyldunnar.  Starfsfólk fær uppsagnarbréfið í hendurnar um mánaðamótin en fjórum vikum síðar er stefnt að því að greiða hluthöfum HB Granda 1,8 milljarð króna í arð,“ segir í ályktun þingflokksins.

Þá segir: „Stefnt hefur í það um tíma að þessar uppsagnir yrðu niðurstaðan og tók HB Grandi ekkert tillit til vilja Akranesbæjar til að koma til móts við fyrirtækið og bæta hafnaraðstöðuna. Það kom því kannski ekki á óvart þegar Þorgerður Katrín Gunnarsdóttir, sjávarútvegs- og landbúnaðarráðherra, skipaði á dögunum þverpólitíska nefnd sem hefur það að markmiðið að skoða möguleika á gjaldtöku í sjávarútvegi.“

Píratar segja að gjaldtaka ein og sér leysi ekki vanda þeirra byggða sem reiða sig á sjávarútveg sem burðarstólpa samfélagsins heldur gæti hún magnað vandamálin ef ekki er hugað vandlega að útfærslunni. „Ríkisstjórnin hefur alls ekki hug á að hrófla við kerfinu og yfirlýsingar Þorgerðar eru því í besta falli marklausar, í versta falli til að slá ryki í augu fólks til að það sjái ekki stöðuna eins og hún er. Samspil gjaldtöku og aðgengis er það sem Píratar stefna að. Píratar vilja gagngerar breytingar á löngu úreltu fiskveiðistjórnunarkerfinu. Við viljum bjóða upp aflaheimildir á opnum markaði. Með þeim hætti er jafnræði, nýliðun og sanngjarn arður þjóðarinnar af fiskveiðiauðlind hennar tryggður. Við viljum gera handfæraveiðar frjálsar og að allur fiskur fari á markað. Markmið Pírata er að bæta aðgengi nýrra aðila, annars vegar að fisknum í sjónum og hins vegar að leyfi til að veiða hann.  Það finnst okkur sanngjarnt,“ segir í ályktun þingflokks Pírata.

Líkar þetta

Fleiri fréttir